Samenwerking tussen de VU Amsterdam en de Fryske Akademy (CODE)

De tekst Jurisprudentia Frisica foarmet it aldergrutste part fan it hânskrift Codex Roorda. It makket diel út fan de Von Richthofenkolleksje fan Tresoar, dy’t sûnt ferline jier registrearre is as Unesco Memory of the World. Dit hânskrift is it lêste dêr’t noch gjin moderne edysje en oersetting fan beskikber is, en dat is net om ‘e nocht. Jurisprudentia Frisica is in tekst dêr’t de gearwurking tusken rjochtshistoarisi en Aldfrisisten foar nedich is. De tekst bestiet út in Aldfryske haadtekst, mei in útwreide glosse-apparaat der om hinne. De Latynske tekst is wol twa as trije kear sa omfangryk as it Aldfrysk. En wêr’t by it Freeska Landriucht, dat ferline jier útjûn is troch it team Hallebeek, De Jong en Nijdam, it Aldfrysk op himsels stiet en de glossen dêr in Jurisprudentia Frisica goed op gong kommintaar op leverje, is it by Jurisprudentia Frisica gauris sa dat it Aldfrysk in oersetting is fan it Latyn yn de glossen. It gelearde rjocht wie yn dizze tiid, de lette 15e iuw, liedend. De útjefte fan de tekst is ynhâldlik oer de helte: it team hat noch in pear jier te gean. De wurksessy fan 26 en 27 juny wie bedoeld om noch in slach te meitsjen yn de earste 20 fan de yn totaal 87 titels fan de tekst. Der binne definitive karren makke oer de twa lagen dy’t yn it glosse-apparaat te ûnderskieden binne en oare edysjetechnyske saken. Dizze earste 20 titels sille yn foarriedige foarm ynkoarten online publisearre wurde, om it (ynter)nasjonale publyk meisjen en meitinke te litten (UT DE SMIDTE (58ste jiergong, nûmer 1, simmer 2024)).